جوال
جوال وضاع مني الزمان
جوال وتاه عني المكان
جوال وصار عمري هلاك
من غير لقاك من غير هواك
زمان هنا عشت في أمان
حتى بهواك سحرتني
بس الحقيقه لما حان
معاد لقاك هجرتني
في الليل وحيد في الكون غريب
سهران شريد من غير حبيب
ليه يا زمان ضاع الوفا
ليه يا زمان طال الجفا
في البعد زاد دمعي وسال
والصدّ خلّى السهد طال
ليه يا زمان دربي عذاب
ليه يا زمان حبي سراب
بتّ الليالي للسحر
من غير نجوم من غير قمر
ليه يا زمان خان الحبيب
ليه يا زمان مليش نصيب
من غير صديق بطلع جبال
حتى الطريق ضاع في الرمال
ليه يا زمان حبه دلال
ليه يا زمان وصله محال
الشوق
يا شوق معاك غلبتنا
ارحم بقه خاف ربنا
يا شوق حرام تعبتنا
تعّبت روحنا وقلبنا
يا ريت تعيد ليّه الحبيب
يا ريت تقرّب وصلنا
ليه بس تزيد فيّه اللهيب
ليه بس تفرّق شملنا
يا شوق خطاك ماليه المكان
شايفين أثارها ع الدروب
في كل وقت وكل زمان
سامعين دبيبها في القلوب
جوّه البيوت لوحدنا
من غير معاد بتفوت لنا
بتهزّنا وبتهدّنا
حتى في عملنا وشغلنا
وحنا في سفر إنت الأنيس
رغم الضياع رغم العذاب
وحنا في سهر إنت الجليس
رغم البعاد رغم الغياب
نارك يا شوق كاويه الضلوع
طول ما الفراق طال والنوى
والله يا شوق سوى الدموع
ملناش طبيب ملناش دوى
يا راغبا
يا راغبا في أدمعي
يا غائبا عن مسمعي
كم انت ثلجي معي
والشوق كاو اضلعي
القلب قد هام ولم
ينتابه غير الألم
كم منك عانيت وكم
وما أحسست بالندم
إنّ الغرام بلوتي
لطفا بنا يا حلوتي
بالرغم من مرارتي
كان الغرام سلوتي
غرامنا لا يفهم
إحساسنا كم مبهم
في لحظة كم يعظم
وبعد حين يفطم
إن كنت يوما غاضبا
أو جئت يوما عاتبا
تجيئني مداعبا
فألتقيك تائبا
أمرك عجيب
أمرك عجيب والله
إنت اللي بتعاتب
أمرك غريب والله
إنت اللي بتحاسب
أنا اللي ياما سهرت
حقّ العتاب ليه
ونا اللي ياما صبرت
حقّ الحساب ليه
غريب عجيب حبك
تهجر وتتكلم
عنيد شديد قلبك
تغدر وتتألم
مين قلبه بات سهران
من كتر أشجانه
مين فكره كان حيران
من كتر أحزانه
صابر أنا ومظلوم
لكن مفيش فايده
عاشق أنا ومحروم
والنار سنين قايده
لله شكيت أمري
مين غيره يفهمني
من نار هواك عمري
مين غيره يرحمني
شكرا
شكرا لك يا فرحة قلبي
شكرا لك يا بهجة حبي
شكرا لك يا شمسي وبدري
ع الأيام الحلوه في عمري
شكرا لك يا اللي جمالك
من أول نظره سحرني
شكرا لك يا اللي وصالك
من أول مره أسرني
شكرا لك يا توأم روحي
يا بلسم دمعي ونوحي
شكرا لك والله السعاده
جوّه الروح دايما بزياده
شكرا لك يا نور أيامي
يا منية قلبي وأحلامي
شكرا لك يا اللي في خيالي
وفي قلبي سكناك ليالي
شكرا لك يا حبي الصادق
شكرا لك من قلبي العاشق
شكرا لك ويا ريت أقدر
عن شكري العارم أعبر
مين كان يصدّق
مين كان يصدّق حبيبي
هيكون في بعدك نصيبي
ضياع شبابي ونحيبي
ونار عذابي ولهيبي
مين كان يصدق غرامنا
هيضيع بثانيه وهيامنا
مين كان يصدق ملامنا
هيزيد عنادنا وخصامنا
يا نور عيوني بصدك
ضيّعت حبّك وودّك
وبطول غيابك وبعدك
زوّدت كبرك وعندك
أجمل حكايه وروايه
للحب كانت معايا
بسّ الغريبه النهايه
هيّه اللي كانت بدايه
معرفش إيه خلّى قلبك
يرضى بهواني وخداعي
معقول غرامك وحبك
يبقى السبب لضياعي
ورجعت لك
ورجعت لك تاني
بالحبّ والأشواق
ورجعت أه ياني
من غربة المشتاق
رجعت لك يا زين
بعد العذاب المر
رجعت بعد سنين
ضيّعت فيها العمر
من غير هواك هالكون
ملوهش صوره وشكل
ملوهش طعم ولون
ملوهش حتى أصل
في بلاد غريبه الجيب
لو كان دهب مليان
والله مهانه وعيب
نستبدله بأوطان
قلب الغريب من نار
والعطف منه مر
أما القريب لو جار
لسه في دياره حر
مهما كبر صيتك
مهما علي اسمك
ما لكش غير بيتك
مين قبله كان ضمك
لمين أشكي
لمين أشكي أنيني
أشواقي وحنيني
لمين أشكي غرامي
أحزاني وألامي
ماليش اشكي اللي فيّه
غير بس للنجمه ديّه
يمكن تحسّ بيّه
أكتر وتخاف عليّه
لو حبك كان حقيقي
كان قلبك جه طريقي
لو عندك زال وكبرك
كان صدك راح وهجرك
يا خسارتك يا زماني
ياللي طال فيك هواني
يا خسارتك يا هوايا
ياللي زاد بيك شقايا
إرجع يا نور عيوني
لسنين حبي الجنوني
إرجع وامسح دموعي
وارحم ذلّي وخضوعي
سيبه
مهما الشجن جواك اشتد
بلاش يا قلبي تترجاه
مهما الزمن وياك امتد
بلاش يا قلبي تستناه
يا قلبي متسيبه في حاله
ده الحبّ عنده تسالي
يا قلبي مالنا وماله
مالنا في عذاب اليالي
خليه كده خالي وطاير
مطارش طير إلاّ وهدى
خليه كده سالي وحاير
مكانش شك إلاّ وعدى
يا قلبي إيّاك تتهادن
لو كان هواه فيه السلامه
يا قلبي إيّاك تتهاون
بالعزه أو بالكرامه
يا قلبي لو نبضك موقوت
بنبض حبه وقلبه
بلاش تخلّي الدقه تفوت
بالذله والحيره في حبه
يا توأم البدر
يا توأم البدر
يا كوكبا دري
الشوق في الصدر
كالسيل في النهر
يا ملهما شعري
قد خانني صبري
أفنيت لي عمري
بالصد والهجر
في الصبح والعصر
والليل والفجر
قلبي على الجمر
وأنت لا تدري
يا شاغلا فكري
قل ما الذي يجري
هل قد من صخر
قلب هوى أسري
يا فاتن الثغر
كالورد كالزهر
قد انحنى ظهري
وما انتهى أمري
يا ريت
يا ريت حبيبي نسيب
الهم ليوم واحد
يا ريت بدل متغيب
نرجع ونتواعد
يا ريت ليوم ننسى
كل شيء حوالينا
يا ريت نعيد ذكرى
أجمل ليالينا
معرفش ليه خايفين
م الناس على قلوبنا
معرفش ليه شايفين
إشواك على دروبنا
يا دنيا خلينا
نحس بأرواحنا
يا دنيا ليه نسينا
بشر وناس احنا
يا دنيا راعينا
ده العمر راح يخلص
يا دنيا واسينا
ايه بسّ راح ينقص
عاتب قلبي
عاتب قلبي عليك
يا رفيق السحب
ليس قلبي في يديك
غير احدى اللعب
فادن مني حبيبي
واستمع لعتابي
قد جعلت نصيبي
في الغرام عذابي
عاتب قلبي عليك
فالمشاعر جاشت
دونما حظ لديك
غير أحلام تلاشت
عاتب قلبي عليك
يا كحيل العيون
ان أشواقي اليك
قد سعت لجنوني
عاتب قلبي عليك
غاضب يا ملاكي
ما جنيت من لدنك
غير اسباب هلاكي
جزيره
قالوا الهنا كله هنا
خضره وهوا بحر وسما
قالو النوى أحسن دوى
للي انكوى بنار الهوى
بسّ الحقيقه يا جميل
نسيان غرامك مستحيل
عشان زمان من كم سنه
زرنا المكان إنت وأنا
في كل حته وكل مسار
بشوف خيالك ليل نهار
ده نا وخيالك من جديد
بعيش معاك عمري السعيد
بلمح جماك في الزهور
بسمع كلامك للطيور
بمشي معاك تحت المطر
بسهر معاك حتى السحر
بحسّ بيك فوق التلال
فوق الهضاب فوق الرمال
بشتاق إليك عند الأصيل
قرب السنابل والنخيل
قلبي معاك طول السهر
عقلي معاك طول السفر
بنسى الكلام بنسى البشر
من نار حنيني للقمر
وداع يا حب
يا حبّ قايم ع الخداع
من قلب نادم لك وداع
خلاص بقه بعت اللي باع
وساب حياتي للضياع
خلاص بقه ويا الرياح
عهد الهوى والحب راح
خلاص بقه حتى السماح
ملوهش لزمه كل صباح
خلاص نسيت عهد الغرام
اللي انقضى وياك قوام
حتى الكلام أصبح ملام
بعد الفراق بعد الخصام
من غير وصالك أو لقاك
إزاي هيرجع لي هواك
وزاي هتسعدني وجفاك
خلّى الحياه بعدك هلاك
والغريب
يا حبيبي حبك
على عيني وراسي
إنّما ليه قلبك
على طول متناسي
والغريب يا عمري
لو شكيت لك أمري
إنت اللي هتزعل
وانت اللي هتتقل
يا حبيبي روحي
بهواك ولهانه
وكمان من نوحي
وجفاك تعبانه
ليه كده يا حبي
ليه على طول مغرور
ليه بقه ضاع قلبي
بعد ما كان مسرور
يا حبيبي تاهت
وضاعت أيامنا
وحقيقي راحت
في الهوا أحلامنا
يا حبيبي الأشواق
على طول بزياده
ونا والله مشتاق
ومش زي العاده
قالوا
قالوا العواذل عننا
حبّ السنين ضاع مننا
قالوا الهوى عمره انتهى
بعد النوى راح واختفى
قلت الغرام هوّ الغرام
مهما الكلام زاد والملام
صنت الوعود صنت العهود
رغم الجحود رغم الصدود
قالوا الغرام لو يتنسي
سعدي أنا راح يكتمل
قالوا الهيام لو ينتهي
جراح الهوى راح يندمل
يا ناس هنايا وبهجتي
دول م الحبيب مهما زعل
يا ناس فؤادي ومهجتي
دول للحبيب مهما تقل
مليش حبيب يا ناس سواه
مفيش نصيب الا معاه
قلبي كبير رغم الجراح
حبي شديد قدّ الرياح
هو المنى كل المنى
لحن الأمل لحن الغزل
هو الهنا كل الهنا
لحن القبل حتى الأزل
هواك
هواك هوايا ورضاك رضايا
وكل رجايا تعيش معايا
لكن عنادك على بعادك
ضيّع ودادك وقاد شقايا
تنام وأسهر وبات أفكر
ازاي هعبر عن اشتياقي
وتقوم ولسه عليه تقسى
وتروح وتنسى يوم التلاقي
يا نور عيوني سبب جنوني
سبب شجوني هوان غرامي
لو كنت غاوي وكنت ناوي
وصلك يداوي عذاب ألامي
فين كل وعودك وكل عهودك
ليه بس صدودك غلب حنانك
فين راح غرامك وذوق كلامك
فين راح هيامك وحب زمانك
طول ما انت
طول ما انت قلبي وحبيبي
طول ما انت حبي ونصيبي
وياك هتبقى الليالي
حلوه وجميله يا غالي
طول ما انت توأم لروحي
طول ما انت بلسم لنوحي
هتكون حقيقه الأماني
واحلام شبابي وزماني
طول ما انت بالحب جليسي
طول ما انت بالود أنيسي
هتعيش بعقلي وفكري
وكلّ دقه في صدري
طول ما انت واقف معايا
طول ما انت صاين هوايا
هتهون يا قلبي وعينيّه
كل المصاعب عليّه
مش قادر أصدق
مش قادر اصدّق كلامك
مش قادر اصدق وداني
دلوقتي لمّا غرامك
ملك فؤادي وزماني
بتقوللي أفضل وأحسن
مشوفش تاني عيونك
بتقوللي أسهل وأهون
أعيش حياتي بدونك
ازاي هعيش يا حبيبي
من غير هواك وجمالك
وازاي هداري لهيبي
وشوق فؤادي لوصالك
ده الشوق اليك يا هوايا
عمّال يقيد وانت جمبي
والخوف عليك يا منايا
عمال يزيد جوه قلبي
يا نور عيوني بشوفك
في كل ورده جميله
وفي كل نجمه بشوفك
وفي كل نسمه عليله
بحسّ بيك جوه ذاتي
وفي كل ثانيه وثانيه
حتى الحياه يا حياتي
من غير هواك والله فانيه
بنده لك
في بلاد غريبه يا روحي
ضيّعت عمري وحياتي
غير بسّ دمعي ونوحي
ما خدت منها يوماتي
بنده عليك يا حبيبي
في ليل أنيني وسهادي
تعال طفّي لهيبي
تعال ريّح فؤادي
بشتاق اليك كل ثانيه
شوق الأسير لسراحه
بسأل عليك كل ناحيه
والقلب شايل جراحه
سيبتك وسيبت القرايب
ومشيت لوحدي الليالي
سيبتك يا أغلى الحبايب
وجريت ورا وهم خالي
فضلت وحدي أكابر
وقول مسيرها هتفرج
لحدّ قلبي اللي صابر
معادش قدامه مخرج
وحياة جمالك
وحياة جمالك يا حبي
مهما فراقك ضناني
هواك هيفضل في قلبي
أمل ينوّر زماني
وحياة دلالك يا روحي
مهما العذاب زاد ونوحي
هواك هيشغل خيالي
مدى الزمان والليالي
وحياة عيونك يا عمري
مهما الحنين راح بفكري
فدا العيون الجميله
سنين حياتي وقليله
وحياة غرامك حبيبي
لو زاد لهيبي ونحيبي
قلبي المتيّم أسيرك
علّق مصيره بمصيرك
وحياة جنوني بحبك
لو طال عذابي بقربك
هصون غرامك وصونك
من كل حساد عيونك
وحياة شبابك وعمرك
لو طال بعادك وهجرك
هصبر وداري الملامه
حتى الرجوع بالسلامه
سماح
سماح يا قلبي عشان ليالي
مجاش ع بالي ولا في خيالي
أوهب غرامي لحدّ خالي
لحدّ حتى ما همّو حالي
سماح يا قلبي سيبتك تعاني
من نار عذابي ونار هواني
سيبتك تحاول لعلّه يفهم
لعلّه مرّه يتوب ويرحم
ليه يا حبيبي عشقان ضياعي
عشقان أنيني عشقان خداعي
يا ريت يا قلبي عرفت اخبي
واكتم حنيني وداري حبي
سماح يا قلبي أسرني حبه
سحرني حسنه ظلمني قلبه
خليك يا قلبي صادق وصابر
لو حتى قلبه فضل يكابر
يا قلبي سامح أرجوك وصالح
عشان ملامك شديد وجارح
بلاش تلومني بلاش تعاتب
من النهارده هتوب وحاسب
لا تغضبي
لا تغضبي حبيبتي
إن جئتني كي نخرجا
لست الذي تبغينه
مدلالا مغنجا
فالنسر يأبى سجنه
لو بالعقيق سيجا
ما كنت يوما آلة
أو هيكلا مبرمجا
فقد أكون ساخرا
أو قد أكون محرجا
إن قلت شيئا نابيا
أو كان ردي هائجا
فالقلب قد ترينه
كالطفل غرا ساذجا
أو كالمحيط هادرا
وثائرا ومائجا
عندي خيال واسع
لا أرتضي ان يسرجا
لم أبن قصرا فاخرا
بل كنت دوما ناسجا
بضاعتي لا تشترى
إذ لم تجد مروجا
بالحبّ قلبي مفعم
والحبّ ليس رائجا
فهل رأيت فارسا
في عصرنا مدججا
بالحبّ والتسامح
فمثله لا يرتجى
في عصرنا اقدارنا
بالحب لن تعالجا
بالقهر أو بالدرهم
يبغي الطغاة المخرجا
جمالك
يا حبيبي الليله جمالك سحرني
وذوقك فتني وحسنك أسرني
يا حبيبي الليله غرامك رماني
ونورك بهرني بنظره ورماني
ده القمر من نورك بان عليه شحوبه
والسمر بحضورك سكت عن عيوبه
والزهور م الغيره في الجناين دابت
والنجوم م الحيره في الليالي غابت
يا حبيبي الليله جمالك حكايتي
حكايه هتسعد معاها حياتي
والليله عيونك هتبقى مرايتي
مرايه هتعكس زماني اللي آتي
يا حبيبي الليله جمالك ده آيه
بتجمع وتشمل جميع المزايا
والليله يا غالي معاك الأماني
هتصبح حقيقه تنور زماني
خايف
يا عمري حبك أمل حياتي
وسر وجودي وكنه ذاتي
يا عمري حسنك مدى الليالي
ملك مشاعري وملك خيالي
بسّ الحقيقه معرفش إمتى
هشوف جمالك يا روحي إنت
معرفش حتى هتكون حبيبي
أو حتى حبك هيكون نصيبي
كل اللي عارفه يا روحي إنك
جميل بحبك بديع بحسنك
حتى اللي شايفه في عيون فؤادي
بقوللي إنّك غير اعتيادي
فينك يا حبي فينك يا عمري
فينك يا شمسي فينك يا بدري
يا عمري خايف ألاقي يأسي
سيطر ع قلبي وسيطر ع نفسي
يا عمري حبك عزيز وغالي
وفي قلبي دايما وفي عقل بالي
بسّ انت فكّر وشوف طريقه
عشان غرامنا يصبح حقيقه
عصفور وطاير
قبل اللقا عشت في عذاب
والحبّ كان وهم وسراب
بسّ الهوى خلّى الفؤاد
بعد النوى بعد السهاد
اللازمه
عصفور وطاير في السما
ويّا النسايم والهوا
عصفور وهايم إنّما
ويّا الأماني والهوى
قبلك فؤادي كان حزين
م السهد والشوق والأنين
بس الهيام خلّى الفؤاد
لما العناد أصبح وداد
حسنك ندر والكل قال
حبّك قدر صعب المنال
بسّ النصيب خلّى الفؤاد
لمّا الحبيب حنّ بمعاد
والله الحياه حلوه في حماك
حلوه بهواك حلوه بلقاك
حتى الحنان خلّى الفؤاد
لمّا الزمان جاد بالمراد
متتأثرش
بلاش يا روحي تتألم
طبع العواذل تتكلم
بلاش للحظه تتندم
عشان مناهم تستسلم
خليك رزين هادي وراسي
أريح لراسك وراسي
خليك سعيد راضي وناسي
مهما الكلام ده كان قاسي
معقول هتقدر تنساني
وتفوتني وحدي لأحزاني
معقول هتقدر تسلاني
وتسيبني تاني لأشجاني
يا نور عيوني انسى الحاسدين
وانسى الملامه واللايمين
معقول نصدق قول حاقدين
ونعيد كلام ناس غير صادقين
يا روحي مين ميعرفش
ازاي يحب مينصفش
ومين كمان ميعطفش
يظلم ويقسى وميخفش
يا روحي سيبهم معذورين
عشان أكيد دول محرومين
يمكن كمان دول مظلومين
أو حتى يمكن مغدورين
إ زّاي
في جنينه جميله والقعده ظريفه
لا روايه طويله أو حتى خفيفه
نستني جمالك وهيامك بيه
نستني وصالك وغرامك ليه
ازّاي بسّ أنسى حبك يا حياتي
ازّاي لمّا أمسى أجمل ذكرياتي
ده نا كل ماشغل روحي بحاجه ثانيه
خيالك بيشعل قلبي في كل ناحيه
معقول صار حقيقه فراقنا وخصامنا
معقول فيش طريقه لعودة غرامنا
يا روحي بكبرك أيام عمري تاهت
وبصدك وهجرك أحلام قلبي ضاعت
محتار يا زماني بقلبه وضميره
خان حبّي وحناني ونا قلبي أسيره
محروم والله قلبي من فرح التلاقي
مظلوم بسّ قلبي على العهد باقي
حيرتني
أيام هواك حلو وجميل
زي النسيم صافي وعليل
وايام جفاك صعب وطويل
حتى الكلام بينا قليل
والله بهواك حيّرتني
حتى بلقاك غلّبتني
هواك ده إيه قوللي بقه
جنّه ونعيم ولا شقا
قلبي الوفي دايما معاك
مغرم بحسنك وبهاك
والروح كمان والله فداك
لو حتى كان حبّك هلاك
يا نور عيوني ليه كده
هوّ الغرام بالشكل ده
حبّ وحنان من غير حدود
بعده بزمان هجر وصدود
والله الغرام عندك عجيب
ده انت العذول وانت الحبيب
حتى الملام زاد بالدلال
والوصل أصبح شيء محال
ازاي هعيش عنك بعيد
والقلب من غيرك شريد
ده انت الحبيب ليّه الوحيد
وانت النصيب بسّ العنيد
ضيعت ليه
مش قادر اصدق يا ملاك
أصبح هواك صعب المنال
مش قادر اصدق صار جفاك
فعلا حقيقه ومش خيال
ضيعت ليه أجمل غرام
واجمل هيام واجمل وصال
صدقت ليه بس الكلام
حتى السلام أصبح محال
سنين ونا قلبي وفي
مهما انظلم مهما انكسر
سنين ونا بس مكتفي
بكلمه عنك أو خبر
قلبي معاك روحي معاك
وفي كل لحظه يا قمر
رغم الفراق عمري فداك
مهما الكلام زاد وانتشر
والله الغرام أحلى قدر
واحلى زمان واحلى نصيب
لو ما الحبيب بيّه غدر
لو ما النصيب راح للغريب
جيت لك
جيت لك أنا يا حبيبي
جيت لك بروحي وقلبي
جيت لك بناري ولهيبي
جيت لك بشوقي وحبي
جيت لك عشان تراعيني
جيت لك عشان تواسيني
جيت لك وتاريك يا عيني
ناسي الغرام وناسيني
جيت لك بذاتي ونفسي
بعد الليالي الطويله
عشان بعادك ويأسي
خلّوا الحياه مستحيله
جيت لك وفاكر حياتي
هتعود بوصلك جميله
جيت لك وفاكر آهاتي
هتكون بقربك قليله
جيت لك وشايل عشانك
الفين حكايه وحكايه
جيت لك ونفسي بحنانك
تمسح دموعي وشقايا
قبلك
ما كانش قبلك حبيبي
حبيب في قلبي وخيالي
ما كانش أصلا داري بي
سوى القمر في الأعالي
إنت الوحيد اللي حبه
سحر عيوني بحلاوته
وانت الوحيد اللي قلبه
أسر ودادي بغلاوته
قبلك سهرت الليالي
أبكي واشكي هواني
حتى بجمالك يا غالي
نورت قلبي وزماني
برد الشتا في البعد عنك
سهر عيوني وجرحني
بسّ الدفا بالقرب منك
نعس جفوني ولفحني
يا نور عيوني بحبك
من كل قلبي وبقول لك
يسلم لي حبك وقلبك
يسلم لي ضيك وظلك
لبيك
وانت بعيد عني اتذكر
قلبي معاك يا حبيبي
وانت وحيد اوعى تفكر
هنسى هواك يا حبيبي
اللازمه
لو بس تقوللي مشتاق لك
من قبل متغمض عينيك
هتشوفني واقف بنده لك
بنده وقول لبيك شبيك
لو كنت مظلوم من غير ذنب
وكنت عايز تتكلم
أو عشت محروم من غير حب
وكنت عاجز تتألم
لو كنت محتاج لهمسه
م القلب تسعد ودانك
أو كنت محتاج للمسه
م الحب تمسح هوانك
لو جيت تدور ع الأحباب
اللي انت ضحيت عشانهم
أو جيت تدور ع الأصحاب
من غير متعرف مكانهم
متسألش
متسألش يا حبيبي
عن عذابي طول بعادك
متسألش عن نحيبي
طول غيابك عن بلادك
وانت جمبي يا منايا
بسّ إسأل عن شعوري
بسّ إسأل عن هنايا
عن رضايا وعن سروري
ما تسألش عن أحزاني
يا حبيبي وعن أشجاني
ما تسألش عن أحلامي
كل ليله وعن أوهامي
ما تسألش عن ظنوني
عن جنوني وعن سكوني
ما تسألش عن جهادي
مع فؤادي ومع سهادي
ما تسألش عن جمودي
عن صمودي في وجودي
ما تسألش عن آهاتي
وعن مماتي في حياتي
لو نويت
يا حبيبي لو نويت في يوم تسافر
أو نويت لبلاد غريبه في يوم تهاجر
اللازمه
خود معاك شمس النهار خود معاك البدر
خود معاك ضي النجوم والسما والبحر
خود معاك كل حاجه بسّ سيب لي الصبر
يا حبيبي لو شقيت في احضان بلادك
نار بلادك لسّه أرحم من بعادك
يا حبيبي الأرض محتاجه لجهودك
ليه تسيبها وهيّه محتاجه لصمودك
بس لو قلبك خلاص قرّر يسافر
والكلام معدش ينفع راح تهاجر
يا حبيبي مهما روحنا ومهما جينا
دم بلادنا برضه رايح يجري فينا
هيّه روحنا وان بكت فيها عينينا
مستحيل يرخص ترابها يوم علينا
بسّ لو قلبك خلاص قرر يسافر
والكلام معدش ينفع راح تهاجر
اللازمه
نفسي أوصف
نفسي أوصف لك هوايا
يا حبيبي وانت جمبي
نفسي أوصف لك هنايا
في نعيم حبك وحبي
ده انت صحّيت بعد غفوه
نبض قلبي وروح حياتي
وانت خلّيت فيّه نشوه
بعد ما طوّل سباتي
يا حبيبي مهما افكر
مستحيل أوصف وصالك
مستحيل حتى أعبر
أو أصور نور جمالك
نفسي اقول لك يا حبيبي
كل كلام الحب بهمسه
نفسي أرسم لك نصيبي
م السعاده لو بلمسه
نفسي أرقص نفسي اغني
نفسي أملا الكون أغاني
نفسي كل الناس تهنّي
قلبي وسنيني وزماني
يا كاتم
يا حبيبي ليه بتكتم
نار هواك عنّي وحبك
بالسكوت مش بس بتظلم
قلبي وحده برضه قلبك
يا حبيب قلبي يا غالي
عمرنا عمّال بيجري
وانت قلبك غير مبالي
فكره لسّه العمر بدري
يا حبيبي بالتردد
مش هتقدر يوم تقرر
مش هتقدر بالتشدد
حتى تختار أو تفكّر
يا حبيب قلبي ظنونك
في الخريف مش رايحه تنفع
والشكوك اللي في عيونك
في الليالي مش هتشفع
يا حبيبي سيب غرورك
سيب قساوتك ودلالك
قبل ميطفي فتورك
نار حنيني لوصالك
No comments:
Post a Comment