رؤيا
يا حبيبي شفت رؤيا
من سنين عدت عليه
قال أخيرا همت بيه
يا حبيبي وعدت ليه
بس يا خساره تلاشت
في الهوى كل الأماني
حتى لو عادت وجاشت
حفتكر ذلي وهواني
يا حبيبي العمر عدى
وانت قلبك غير مبالي
ده انت حتكون بعد مده
من حياتي برضه خالي
يا حبيبي كنت ناوي
اوهبك عمري وحياتي
بس قلبك لسه غاوي
نار عذابي وصوت آهاتي
يا حبيبي خاف ع نفسك
من عذاب الله في حقي
لو صدق قلبك وحسك
من زمان حسيت بصدقي
لولاك
لولاك أنا كان من زمان
قضيت سنين عمري بهوان
معاك وبس عشت بحنان
عشت بسعاده وبأمان
لولاك أنا كان مستحيل
أعشق وحب أو حتى اميل
ده انت الأنيس وانت الجميل
وانت الجليس والليل طويل
لولاك أنا شفت العذاب
والفرح كان وهم وسراب
لولاك هنا كان قلبي داب
والحزن ولى بالشباب
يا أحلى حب شفته وغرام
واغلى شوق عشته وهيام
من قلبي لك على الدوام
أجمل كلام واجمل سلام
لا يا حبيبي
يا حبيبي لم أكن بالمذنب
كي ألاقي مثل هذا الغضب
يا حبيبي لم أجد من سبب
كي أعاني من سياط اللهب
انما انت العطاء والرجاء
مثلما انت الصفاء والوفاء
فالخصام يا حبيبي والأباء
يخبوان عندما يدنو اللقاء
يا حبيبي حينما تحظى العيون
بالتقاء كل شيء قد يهون
فالعذاب والسهاد والظنون
سوف ينسى كلها حتى الجنون
يا حبيبي حبنا بعد الفراق
رائع عند الوصال والتلاق
فالحنين للغرام والعناق
يستحث القلب دوما للوفاق
متلومنيش
لو يوم نسيتك ما تلومنيش
أو يوم سليتك ما تلوميش
بعد الخداع اللي شفته
وبعد الضياع اللي عشته
حتى ان كرهتك ما تلومنيش
بهواك سنين بس يا خساره
حبك سقاني مر الكاس
بهواك ولكن في الحاره
شمت فيه كل الناس
ما ليش نصيب الا بصدك
وظلم قلبك وحبك
ما فيش أمان ليه في بعدك
ولا الحقيقه بقربك
مغرور قوي وده خلاك
تخون وعود قلبك ليه
تقلان قوي وده نساك
تصون عهودك يا عينيه
ما لكش حق مره تحاسب
ونا اللي بشكي وبتألم
ما لكش حق حتى تعاتب
ونا اللي ببكي وبتندم
ازاي تلوم قلبي العاشق
وانت بجفاك بتعذبني
وازاي تلوم حبي الصادق
وانت بهواك بتغلبني
يا اللي هواك
يا اللي هواك على بالي
وليل نهار في خيالي
يا اللي القمر في الأعالي
غار من بهاك في الليالي
يا ريت تطمن فؤادي
عشان غرامك مرادي
يا ريت تهون سهادي
وتصون هيامي وودادي
بشتاق اليك والشوق جبار
خلى الفؤاد شريد محتار
بسأل عليك ليل ويا نهار
أهل الهوى وأهل الدار
لو طال جفاك مش حتسائل
لو زاد قساك مش حتنازل
بكره الغرام حنتبادل
لما العيون حتتقابل
عشت الهوى
من غير جوى أو يوم نوى
عشنا الهوى والشوق سوى
ده انت الهنا وانت المنى
والحب هنا كله لنا
بالإبتسام والإنسجام
كل الخصام يخلص قوام
لو كان كلام بينا وملام
برضه الغرام هو الغرام
لو كان بحار بينا وبلاد
وكان وهاد وكان نجاد
أول معاد بعد البعاد
كل العناد يرجع وداد
حبك وطن واغلى وطن
رغم المحن رغم الفتن
وياك أمن قلبي الزمن
وياك سكن جنة عدن
مش هلومك
مش هلومك مش هعاتبك
يا حبيبي ومش هحاسبك
بس حقول لك سيب طريقي
طول ما حبك غير حقيقي
ده الغرام بين الأحبه
حب وشوق مش بس غربه
والزمان وحده اللي قادر
يطفي نار قلبي اللي صابر
بعد أكتر من محاوله
يا حبيبي ومن مجادله
لسه قلبك مش فاهمني
يا حبيبي ومش راحمني
كل ما اشكي لك غرورك
يا حبيبي زاد نفورك
مهما سامح مهما صالح
لسه كبرك ليه جارح
ليه نلوم
ليه نلوم الزمن والكون والوطن
لو شفنا المحن أو عشنا الفتن
ليه نلوم القدر والشمس والقمر
لو قلب البشر صار زيّ الحجر
مش ذنب الزمن بعيش المحن
وشوف الفتن
ولا ده القدر اللي كان غدر
بيه وراح هجر
من غدرك سنين يا روحي اشتكى
فؤادي وبكى
ومن هجرك سنين صار قلبي سجين
للشوق والحنين
ماليش يا زمن عليك أي ملام
أو حتى كلام
وانت يا قدر مافيش أي غبار
عليك مهما صار
حق قلبي عليك يا اللي النور في عينيك
خلا الروح في ايديك
حق قلبي عليك ياللي اشتاقت ليك
وتعشمت فيك
كان حبي بريء ولا كان جريء
حتى راح غريق
كان قلبي وديع ولا كان مطيع
حتى راح صريع
كنت اعرف منين غرامك يا زين
أبعد م القمر
كنت اعرف منين دموعك يا عين
راح تسقي الشجر
هنسى حبك
زي ما قلبك نسيني
حنسى حبك يا حبيبي
زي ما أشجاك أنيني
بكره حتجرب لهيبي
الوداع لك يا اللي عمري
ضاع بطول هجرك وبعدك
الوداع لك يا اللي صدري
ضاق بنار غدرك وعندك
بعد ما ضيعت حبي
لسه فكرك يوم تنوله
بعد ما تعبت قلبي
لسه عندك شيء تقوله
صنت ودك صنت حبك
رغم بعدك عن عيوني
بس عندك قسى قلبك
حتى هان حبي الجنوني
هو معقول طول حياتي
أبكي وتألم وداري
هو معقول صوت أهاتي
ليل نهار يزداد وناري
بحسد
يا حبيبي بانتظارك
وانشغالك واعتذارك
صرت أحسد كل واحد
كان معاك أو لسه قاعد
صرت أحسد كل نحله
من خدودك جات بقبله
صرت احسد كل زهره
من شفايفك جات بقطره
صرت أحسد كل همسه
قالها عاذل ليك بلمسه
صرت أحسد لو لمره
بص ليك حاسد بنظره
صرت أحسد في الليالي
كل نجمه بيك تلالي
صرت أحسد لاجل خاطرك
كل نسمه فيها عطرك
صرت أحسد حتى حبي
يا حبيبي وعشق قلبي
صرت أحسد برضه ذاتي
ع الهوى المالي حياتي
يا حلوتي
يا حلوتي لا تستحي
طلي عليه وصبحي
يا حلوتي ليه تسمحي
قلبي المتيم تجرحي
يا حلوتي ليه الغرور
ليه المكابره والنفور
يا حلوتي ليه الفتور
مش كل يوم قلبي صبور
يا حلوتي مهما الجمال
عدى الحقيقه والخيال
والله الجمال حتى الكمال
صعب المنال حتى محال
يا حلوتي لا تدعي
هيا افهميني واسمعي
هيا ارحميني واشفعي
بالله عليكي ترجعي
يا حلوتي بكره الخريف
من غير أنيس حيكون مخيف
حتى المنام حيكون خفيف
لما البصر يصبح ضعيف
يا حلوتي لا الكبرياء
حتفيد بشيء ولا الجفاء
بكره ان ندهت للقاء
مين بس حيسمع لك نداء
يا حلوتي قبل الأفول
يا لله اسمعي مني الأصول
بكره الجمال ده راح يزول
مين نال خلود أو راح ينول
خلاص بقه
خلاص بقه مليت هواك
مليت بعادك وجفاك
سنين ونا سهران وحيد
حيران شريد سرحان بعيد
خلاص بقه مليت غرام
ما سمعت عنه غير كلام
خلاص بقه مليت هيام
ما شفت منه غير ألام
يا عم بلاش كدب وخداع
أفضل لنا تقول الوداع
ليه بس أعيش عمري بهوان
من غير أمان من غير حنان
بتغيب سنين من غير خبر
من غير جواب لو مختصر
حتى انتهى عهد الهوى
بالهجر والصد والنوى
لما الغرام عندك سراب
ليه بس تفوتني للعذاب
ليه بس تسيبني للألم
من غير شعورك بالندم
حرام عليك
حرام عليك غلبتني
م الشوق اليك تعبتني
حرام عليك ده الهجر طال
والقلب داب والدمع سال
لو بس أعرف ايه جرى
للحب والشوق يا ترى
ده احنا الهوى عشناه سوى
قبل النوى من غير جوى
ليه بس هان حبي عليك
ليه بس ضاع من بين ايديك
ازاي حعيش عنك غريب
وانت الحبيب وانت النصيب
لأ يا جميل اعمل حساب
بعشق هواك رغم الغياب
لأ مستحيل نسيان هواك
ازاي ونا والروح فداك
ان شفت حد فكرني بيك
صحى الغرام في قلبي ليك
وان قال لي حد عنك كلام
صحى الحنين والشوق قوام
لو يوم لقيت نفسي في مكان
زرناه سوى أيام زمان
ضج المكان بالذكريات
ذكرى اللي كان بينا وفات
خليك شجاع
خليك شجاع بعد الوداع يا قلبي
خليك شجاع وانسى الضياع يا قلبي
مهما الحبيب أصبح غريب عن هواك
مالوش مفر مهما أصر من لقاك
سيبه انت بس للذكريات والزمن
بكره الحنين حيجيبه ليك والشجن
رغم الغرور رغم النفور والفتن
جواه غرام اكبر كتير م العلن
يا قلبي ليه ملهوف عليه ليل نهار
اشمعنى بس قلبه ما حس يوم بنار
يا قلبي ايه شدك اليه من جديد
لما الفراق بعد الوفاق صار أكيد
يا قلبي ليه كتر الكلام والملام
ليه العتب ليه الغضب والخصام
حيفيد بأيه لومك عليه ده الغرور
ضيع هواه وضيع وفاه من شهور
بقالي سنين
بقالي سنين ونا اتمنى
ونا استنى هوى عمري
ومر العمر ونا اترجى
وقول يا حب تعال بدري
وجاني الوعد وكان أحلى
من الأحلام يا حبيبي
وجاني السعد وكان أغلى
من الأيام يا نصيبي
جمالك يا رفيق دربي
سحر قلبي أسر ودي
وصالك يا هبة ربي
سلب عقلي ملك وجدي
حبيبي والله ممنونك
على روعة هواك ليه
ده نا قلبي فدا عيونك
وكل الكون ده والدنيا
حبيبي بس بلاش تزعل
اذا العالم حسد حبي
بلاش أرجوك في يوم تتقل
على روحي وعلى قلبي
فاضلك أيه
نسيت وعدك نسيت عهدك فاضلك ايه
سنين صدك سنين بعدك قاسيتهم ليه
خلاص يا عم راح انسى الهم ونار الويل
لا شوق واشجان ولا أحزان في صبح وليل
سراب واوهام هواك واحلام بقه معقول
بقيت محتار وقايد نار من المجهول
هيامي بيك وشوقي ليك خساره فيك
يا ريت ما حب فؤادي وطب ومال لعينيك
غريب أمرك عجيب طبعك بقيت تشكي
ونا العاشق ونا الصادق سنين ببكي
خلاص ما تقولش عشان ما فضلش كلام يتقال
وحتقول ايه وحتعيد ليه بقه الموال
حديث الأمس
يا حبيبي رغم حبي
لسه برضه عزيز النفس
م النهارده جوه قلبي
صرت عندي حديث الأمس
لو حنيني زاد يوماتي
مش حسامحك مش ححاسبك
لو أنيني عاد ليلاتي
مش حصالحك مش حعاتبك
مش حقولك طال سهادي
طال عذابي وزاد هواني
مش حقولك ضاع فؤادي
ضاع شبابي وراح أماني
يا حبيبي زيف غرامك
بان ببعدك وبفتورك
انما الكبر في كلامك
بان بصدك وبنفورك
يا حبيبي في الليالي
مش حتسهر لك عيوني
حتى من قلبي وخيالي
حنزع الحب الجنوني
يا حبيبي مهما تبكي
مش حتنزل مني دمعه
ومهما تحكي ومهما تشكي
مش حتشعل فيه شمعه
لأ يا حبيب قلبي
دلوقت بس بعد الحبيب
ما خان هواك رجعت لي
دلوقت بس لما النصيب
راح للغريب اشتاقت لي
لأ يا حبيب قلبي أنا
حبك نسيته من زمان
مهما عملت عندي هنا
ما لكش خالص أي مكان
ياما رعيت حبك وكان
حظي معاك ذل وخضوع
ياما سقيت قلبك حنان
لما رويت خدي بدموع
فكرك حبيبي بكلمتين
تقدر تعيد عهد الغرام
طب كنت فين من سنتين
لما الغرام ضاع بالخصام
جاي تعمل ايه لما انكسر
قلبي الحزين من طول جفاك
ده الجرح ع الخد انحفر
من دمع عيني ونار هواك
دوق العذاب دوق المرار
شوف السهاد والليل طويل
لف الزمان عليك ودار
حتى الفرار صار مستحيل
يا بنات
يا بنات الحب ده هبه من الرب
لسعادة القلب
ليه فاكرينه هزار على سطح الدار
ولا في مشوار
يا بنات الناس ده الهوى اخلاص
على طول واحساس
لا كلام أفلام ولا قول احلام
في منام واوهام
يا بنات الود ده ثبات ع العهد
ووفاء للوعد
لا ملام ونفور ولا صد وفتور
على طول وغرور
يا بنات الشوق ولهيب الشوق
بطير بينا لفوق
لا غرام يتقال في كلام موال
ولا لعب عيال
ياما فيه أحزان وهوان واشجان
وعذاب أشكال
ليه بقى فاكرين يا بنات حلوين
الهوى موّال
ده الهوى أكبر وكمان اكتر
من كده يا عيال
ارحم لي قلبك
يا حبيبي ارحم لي قلبك
وارحم القلب اللي حبك
لو غدر صاحبك بحبك
خلّي إيمانك بربك
يا حبيبي افتح لي تاني
قلبك اللي سنين سلاني
من زمان طيفك مجاني
بعد ما هجرك ضناني
لو حبيبك قلبه خانك
بعد ما حسّ بحنانك
لو أنا كنت في مكانك
مستحيل أرضى بهوانك
يا حبيبي ارجع لنفسك
ده انت حقك تنسى أمسك
ليه حتفضل جوّه يأسك
ليه حتقبل باللي مسّك
يا حبيبي انسى اللي باعك
واللي كان عاشق خداعك
حتى ده من غير وداعك
راح وسابك لضياعك
هجرتني
هجرتني ليه يا قاسي
من غير متسمع كلامي
ظلمتني ليه يا ناسي
حبي وهيامي وغرامي
هجرتني قلت ماشي
طب خدت قلبي معاك ليه
ظلمتني برضه ماشي
طب سيبت طيفك عشان إيه
عشّمت قلبي بحبك
وقلت حبك هنايا
لكن نصيبي بقربك
مكانش غير بس شقايا
خدعت قلبي وسامحتك
وقلت يمكن حتفهم
جنيت عليّه وصالحتك
وقلت جايز حترحم
فضلت ترفض وصالي
وكل همسة ملامه
حتى بقيت غير مبالي
بكلّ عزّه وكرامه
No comments:
Post a Comment