الناي
يا حبيب قلبي ومنايا
طول ما قلبك مش معايا
بشكي همي ونار هوايا
في الليالي لناي صبايا
يا حبيبي فين زمانك
فين غرامك وحنانك
ده الفؤاد والله عشانك
لسه حافظ لك مكانك
يا حبيبي بطول بعادك
راح يضيع مني ودادك
أيه شعورك أيه مرادك
من غرورك وعنادك
يا حبيبي قلبي خايف
من غيابك وانت عارف
بس برضه ربي شايف
قد ايه احساسي عاصف
يا حبيبي ليه بتقسى
والغرام جوايا لسه
يا حبيبي ليه بتنسى
وفي وداني كل همسه
شوف الغرام
شوف الغرام في الدنيا دي
شوف يا حبيبي واستغرب
أصبح طبيعي وشيء عادي
نحب ونكدب ونهرب
ما فضلش في الدنيا صادق
غير بس حبك وحبي
ما فضلش مغرم وعاشق
غير بس قلبك وقلبي
فين الغرام العارفينه
من الغرام الشايفينه
غرام جميل وبثينه
وابن الملوح وليلى
فين الغرام وغلاوته
فين الهيام وحلاوته
فين المشاعر والأحساس
فين المحبه والأخلاص
حب النهارده تسالي
مش الغرام المثالي
ده صار غرام ولاد وعيال
وصار كلام بالخوف يتقال
ده الحب عالم واحنا فيه
مالناش حياه غير بس بيه
و الحب عالم بصموده
مرهون وجودنا ووجوده
عينونك
يا حبيبي في الأغاني
للعيون أوصاف كتيره
بس يا خساره المعاني
جات على نفس الوتيره
بس برضه كل فكره
في القصايد جات جميله
انما دي بألف مره
مش كفايه وفيك قليله
دي الكواكب في الليالي
جات بنورها من جبينك
والمراكب جات يا غالي
بالكنوز دي بلون عيونك
يا حبيبي مين حيقدر
يوصفك انت وجمالك
مين حيقدر مهما فكر
ينصفك انت وخصالك
يا حبيبي مهما قالوا
لسه حسنك فوق خيالهم
ده انت لزمك قول بحاله
والكلام ده مش مجالهم
يا قلبي بيع
بعد ما خانك حبيبك
اللي فكرك كان نصيبك
بعد ما ضيع شبابك
لما غاب عنك وسابك
يا فؤادي امسح دموعك
وامسح الذل بخضوعك
ده الغرام قبل البدايه
بالملام وصل النهايه
يا فؤادي انسى اللي خانك
وانسى مين جاب لك هوانك
حتى بيع مين قلبه باعك
واللي كان يعشق خداعك
يا فؤادي اعمل حسابك
مش حينفع فيه عتابك
ده اللي خانك خان زمانك
خان غرامك خان حنانك
يا فؤادي لو خيالي
كان هيامك بيه وغالي
لسه جواك في كرامه
لسه عندك في شهامه
يا فؤادي ارجع لنفسك
وانسى حزنك وانسى يأسك
بص لبكره وبص لبعده
وانسى وده وانسى عهده
عهد الغرام
لمّا الغرام بينا مضى
عهد الهوان بينا ابتدى
حتى الهيام راح وانقضى
لمّا الحنان ضاع والأمان
ليه يا زمان كل اللي كان
بينا زمان عدى وراح
ليه يا زمان من غير أوان
زي الدخان طار في الرياح
هو اللي كان بينا غرام
ولا اللي كان كدب وخداع
هو الهيام حب وانسجام
ولا الطريق الى الضياع
من غير كرامه لأ ما ليش
بالحب والشوق والهوى
من غير شهامه لأ ما فيش
في القلب غير صد ونوى
والله الغرام يا عم جميل
لما الحبيب يشتاق اليك
بس الغرام ده مستحيل
لما الحبيب يتقل عليك
حرام
والله حرام والناس في عيد
تفضل بعيد عني وعنيد
والله حرام والعام جديد
قلبي الوحيد في الكون شريد
والله حرام تنسى الغرام
والناس في فرحه وانسجام
والله حرام كل الهيام
أصبح ألام بينا وخصام
ده العيد محبه وانشراح
والناس بنشوه وارتياح
بس الحبيب خلى الجراح
حظي ونصيبي ليل صباح
اشمعنى بس قلبي أنا
في العيد كمان حظه الضنا
واشمعنى بس وحدي هنا
محروم من الحب والهنا
ارجع حبيب قلبي وعود
ارجع وصون كل الوعود
ده انت الحياه وانت الوجود
وانت سبيلي للصمود
ارجع حبيبي ده الغنا
والرقص واصل للسما
غير بس قلبي م الجوى
وحده العليل وانت الدوى
ارجع عشان رغم الزهور
رغم المعايده والسرور
قلبي المتيم راح يثور
على الفتور ده والنفور
نفسي أحب
نفسي أحب يا ناس نفسي
نفسي أحب وانسى نفسي
نفسي أحب وانسى نحسي
وانسى عذاب أمسي ويأسي
نفسي أحب بس الاقيك
يا اللي ليالي بحلم بيك
نفسي أشوفك وراعيك
نفسي أضمك ولاغيك
نفسي أحب وقول للكون
حبي وهب لك طعم ولون
نفسي أحب وعيش مفتون
بأحلى بدر وأحلى عيون
نفسي أحب لأبعد حد
لسنين طويله مالهاش عد
نفسي أحب حب ولا حد
من قبل مني عرفه بجد
نفسي أحب واشكر ربي
نفسي أحب من كل قلبي
نفسي أعيش وياك حبي
وانسى معاك يأسي وغلبي
مش حسامحك
مش حسامحك يا حبيبي
يا اللي قلبك خان هوايا
مش حصالحك لو نصيبي
كان في بعدك طول شقايا
مش حسامحك مهما تحكي
مهما تشكي ومهما تبكي
مش حصالحك مهما تنفي
ومهما توعد بكره توفي
مش حسامحك ياللي قلبك
باع غرامي وباع حناني
مش حصالحك ياللي حبك
ضاع وضيعني بهواني
مش حسامحك ياللي غدرك
خلى هجرك طال وصدك
مش حصالحك ياللي كبرك
خلى عندك زاد وبعدك
مش حسامحك لو دموعي
جرّحت خدّي وضلوعي
مش حصالحك بسّ حبي
لك هيفضل جوّه قلبي
زمن سعيد
عشان حبيبي صار أكيد
بينا الغرام واصبح شديد
عشان حقيقي بات سعيد
قلبي اللي كان قبلك شريد
حرقص وغني للزمان
اللي بهواك أصبح أمان
حرقص وغني وبحنان
حملا المكان بعد الهوان
ليل الجراح يا قلبي راح
لما الصباح بنوره لاح
حتى النسيم بالعطر فاح
لما الحبيب بالحب باح
والله حرام أجمل غرام
يصبح خصام بينا وملام
بس الأله رب الأنام
خلى الحبيب يرجع قوام
دلوقت بس بعد الضنا
حضن الهوى حيضمنا
دلوقت بس بعد اللقا
كل المنى حتكون لنا
يا خساره بس على الحنين
اللي كوى القلب الحزين
يا خساره بس على الأنين
اللي ملا الدنيا سنين
إشاعات
ياما سمعت عنك كلام
ياما وصل منك ملام
ياما الأشاعه عذبت
قلبي وياما تعبت
قال ايه غرامك يا جميل
صعب المنال أو مستحيل
عشان غرور قلبك رهيب
عشان فتور حبك عجيب
بس الغرام بينا كبير
قد الوجود واكبر كتير
رغم الأشاعه كان شديد
رغم الملامه كان عنيد
ما عرفش ليه عند البشر
أصبح مباح نقل الخبر
ده من الصباح حتى السهر
بسمع كلام بكوي الحجر
ليه بس كده يا ناس حرام
خلاص بقى لحظة سلام
حيفيد بأيه بينا الخصام
ولا الملام طبع الأنام
يا نور عيوني ربنا
هو اللي بس عالم بنا
هو اللي أدرى بقلبنا
هو اللي حيصون حبنا
ع الشط
ع الشط قاعد يا عمري
والوجد قايد في صدري
ع الشط قاعد وفكري
كالموج بقلبي بيجري
لولا الأمل والأماني
وعشق قلبي وحناني
كان عمري ضاع وزماني
كان سهدي طال وهواني
ع الشط قاعد حبيبي
والدمع حظي ونصيبي
لا الموج بطفي لهيبي
ولا بخفف نحيبي
ع الشط قاعد يا غالي
وانت وزمانك ع بالي
أيام بعيشها وليالي
في عيون فؤادي وخيالي
ع الشط قاعد وسارح
والفكر في البحر سابح
ع الشط قاعد وجامح
في القلب وجدي وجارح
وصل سلامي يا هوى
ويا النسايم والهوا
يا ريت يا عمري نعود سوى
ونعيد زمان عشناه سوى
عشان هواك
عشان بخاف عليك أنا
من كل حسادك هنا
حسكنك في بيت جديد
عن العيون والناس بعيد
حسكنك ع شط جميل
بين الجناين والنخيل
ما نشوفش غير بس الطيور
فوق الروابي والصخور
خلاص بقى خلاص كده
أصبح محال الوضع ده
كل يوم اشاعه أو كلام
كل يوم وشايه أو ملام
هناك بعيد عن البشر
تحت النجوم تحت القمر
حنعيش سوى ويا الهوى
ويا النسايم والهوا
حنعيش هناك قصة غرام
في دنيا تانيه يا سلام
دنية حنان دنية هيام
دنية محبه وانسجام
هنعيش مع الموج والرياح
ونفرش الرمله وشاح
حنقوم ونمشي ع التلال
والسهره تبقى ع الرمال
يا واد
يا واد غرامك ع بالي
وليل نهار في خيالي
بس الحقيقه يا غالي
بالهجر دايما تغالي
يا واد ترفق بحالي
وارحم سهاد الليالي
والله حرام لا تبالي
حتى بأجابتك سؤالي
يا واد بمنعك وصالي
خيبت ظني وآمالي
حتى بغيابك نضالي
ما عادش قد احتمالي
مالي
يا واد يا هاوي التسالي
ليه بس غاوي انفعالي
ليه صرت تهوى التعالي
ليه صرت م الحب خالي
لو كنت
لو كنت في الدنيا الفضا
شمس وقمر ونجوم سما
لو كنت أجمل م الجمال
والحسن فاق حد الخيال
ما سمحش لك تتكبري
ما سمحش لك تتأمري
بالحب وحده تقدري
بالحب وحده فكري
لو كنت سلطانة زمان
وكان في ايدك صولجان
لو كنت حتى للأزل
لحن الغرام لحن الغزل
لو كنت مصدر للحياه
زي الهوا وزي المياه
لو كنت الهام للقلوب
وكنت نور على الدروب
لو كان صمودي مستحيل
عشان فراقنا كان طويل
لو داب فؤادي م الحنين
وطال سهادي م الأنين
الجمال نسبي
يا حبيبي م البدايه
بان عليه نور جمالك
بس ما أثرش فيه
في النهايه غير خصالك
دي العيون أقمار كحيله
والخدود أزهار جميله
والجمال في الناس ده نسبي
برضه في عينيه وقلبي
يا حبيبي لسه أحلى
من جمالك ظرف قلبك
يا حبيبي لسه أغلى
من دلالك صدق حبك
لو جمالك يا حبيبي
كان حقيقي شيء خيالي
مش حيقدر يا نصيبي
يغلب الدهر والليالي
بالموده والمسامحه
راح تعيش قصة هوانا
بالمحبه والمصالحه
راح تدوم بسمة هنانا
معقول
معقول خلاص قلبك نوى
من غير مصالحه ع النوى
ازاي بقى بعد الهوى
ما طاب لنا وحنا سوى
معقول خلاص نويت تغيب
وتروح بلاد عنها غريب
ازاي حعيش من غير حبيب
وانت الدوى وانت الطبيب
ازاي حعيش وازاي حكون
من غير ما شوف أجمل عيون
والله البعاد عنك جنون
وارحم كتير منه المنون
معقول نسيت عهد الغرام
ونسيت كمان عهد الهيام
ليه بس زاد بينا الخصام
بعد الموده والوئام
معقول تفوتني للهوان
من بعد ما ديتك حنان
معقول تسيبني للزمان
من بعد ما اديتك أمان
معقول أصون أيام هواك
وتخون هوايا بطول جفاك
معقول يكون حبك هلاك
ونا اللي ظنيتك ملاك
هو الغرام
من يوم لقاك ونا قلبي في حيره
عشان هواك ده غريب السيره
أيام بحس بسعاده كبيره
وايام بحس بمراره وغيره
هو الغرام ده نعيم يا ربي
ولا الغرام ده عذاب لقلبي
يا اهل الهوى اداري وخبي
ولا اشتكيله هواني وغلبي
غريب بحبك عجيب في طبعك
مبسوط بوضعي معاك ووضعك
ان جيت ازورك حرقني شمعك
وان قلت سيبني غلبني دمعك
يا ريت تشوف لي وياك طريقه
عشان تقول لي ايه الحقيقه
دي الحيره هايجه فيه وعميقه
والغيره عاصفه والروح غريقه
جايز
صفات كتيره بتعجبني فيك
حاجات جميله بتسحرني بيك
بس الحقيقه فيك شيء معين
ايه بس هو ما قدرش ابين
جايز بحبك لأن قلبك
أمين وصادق سنين بحبك
جايز بحبك عشان وصالك
عشان دلالك ونور جمالك
جايز بحبك عشان كرامتك
عشان غلاوتك عشان شهامتك
جايز بحبك عشان رزانتك
عشان حلاوتك عشان أمانتك
جايز بحبك عشان عيونك
عشان جنونك عشان فنونك
جايز بحبك عشان وفاءك
عشان صفاءك عشان اباءك
جايز بحبك عشان حياتي
هاديه وسعيده معاك يوماتي
جايز وجايز يا روحي انت
كل الصفات دي وشويه حتى
No comments:
Post a Comment