بشتاق لك
من بعيد بشتاق لك انت
يا حبيب عمري وزماني
من بعيد بنده لك امتى
من جديد هتعود لي تاني
يا حبيبي نفسي اشوفك
نفسي اضمك بين إيديه
يا حبيبي خلّي طيفك
ع القليل يسأل عليّه
مهما تزعل يا حبيبي
ومهما تتقل قلبي مغرم
حتى لو طوّل نحيبي
وقاد لهيبي مش هيندم
ده انت روحي وانت عمري
وانت حب قلبي الجنوني
وانت شمسي وانت بدري
مهما تبعد عن عيوني
بسّ آه لو مرّه تفتح
يا حبيبي ليّه قلبك
حتى أعرف ليه بتجرح
بالبعاد قلبي اللي حبك
طال بعادك
يا حبيبي طال بعادك عن عينيّه
رغم إنك والله أغلى الناس عليّه
يا حبيبي يجرى إيه لو يوم شويّه
حسّ قلبك بالحنين ورجعت ليّه
ده الخصام والهجر بينا مهما طوّل
لسّه حبك جوّه قلبي زيّ أوّل
حتى حبك كلّ يوم عمّال بيكبر
والحنين عمّال يزيد اكتر وأكتر
يا حبيبي فكرك انّي حنسى حبك
فكرك انّي حقسى زيّك آه يا قلبك
إنسى واقسى يا حبيبي للنهايه
بس هقول لك يا حبيبي م البدايه
بكره لمّا الشوق يهزّك يا حبيبي
راح تجرّب نار عذاب قلبي ولهيبي
ليه بتنسى ليه بتقسى مين هيسمع
في الليالي شكوتك وإيه هيشفع
لست أدري
لست أدري يا حبيبي
كيف تغفو في الليالي
دون وجدٍ أو شجونٍ
أو حنينٍ للوصال
اللازمه
أي عهدٍ يا حبيبي
خنته حتى أعاني
من بعادٍ دون حق ٍ
أو عذابٍ أو هوان
لست أدري كيف تصحو
كلّ يوم في الصباح
راغباً في العيش دوني
بلا وهاوٍ للمزاح
اللازمه
لست أدري كيف تقضي
وقتك العادي المملا
دون أن تسعى لوصلٍ
يبعث الحبّ الأهما
اللازمه
لست ادري كيف تلهو
في الليالي وتسامر
ثمّ تغفو كالرضيع
ثمّ تصحو كي تفاخر
يا ريت تقوللي
يا ريت تقوللي يا قمر
لمّا الحبيب ينسى الحبيب
ذنب الغرام ولاّ البشر
ولاّ احنا فيك ملناش نصيب
يا ريت تقوللي انت ليه
خليت سهاد عيني طويل
هو احنا يعني قلنا إيه
حتى البعاد طال يا جميل
لمّا انت مش قد الغرام
ميّلت قلبي ليه إليك
ولاّ الغرام عندك حرام
حتى بسهوله هان عليك
يا عمّ حتى لو سراب
الحب عندك قول كده
عشان خلاص ملّيت عذاب
هوّ الغرام بالشكل ده
حبيت هواك لحظة لقاك
وكان هواك عشقي الوحيد
معرفش ليه خليت جفاك
حظ ونصيب قلبي الشريد
نفسك تقوللي
نفسك تقوللي بحبك
من بدري بدري وتمللي
بس المكابره في قلبك
هيهّ اللي مانعاك تقوللي
يا عمّ قرب وصارح
بلاش تضيّع شبابي
يا عمّ جرب وفاتح
حرام تزوّد عذابي
يا عمّ والله في عيونك
شايف المحبه والأشواق
بسّ المخاوف وظنونك
كابته المشاعر في الأعماق
يا عمّ والله بريدك
والحب راسخ في قلبي
بسّ المكابره هتفيدك
بإيه عشان ارضى بغلبي
يا عمّ نفسك تحكيلي
عن ليل سهادك واشجانك
نفسك تجيني وتشكيلي
عن نار غرامك واحزانك
ملناش نصيب
ملناش نصيب في الحب يا ناس
ملناش نصيب
بعد الحنين والشوق سنين
باعني الحبيب
خلاص بقى ملناش أمل
في الحب يا ناس
يبدو الشقا في الحبّ صار
هوّ الأساس
يا دنيا إيه صار للبشر
حتى القلوب
معادش تعرف بعضها
غير بالحروب
هوّ الغرام يا ناس حرام
ولاّ الفلوس
هيّه اللي صارت تشتري
حتى النفوس
يا دنيا فين عهد الهوى
والحب راح
ليه الوفا أصبح جفا
والشوق جراح
معقول مزايا الحبّ راحت
واختفت
والناس خلاص بس بالمصالح
اكتفت
إن كان كده خلاص بقى
أفضل نتوب
بلاش نضيع ونتوه كمان
بلاش ندوب
يعني الغرام لو كان عذاب
هيفيد بإيه
ولاّ الحبيب لو عاش غريب
هيجيلنا ليه
مرّت سنه
مرّ سنه وجات سنه
وانت وانا لسّه في خصام
والله حرام بعد الهنا
والشوق هنا تنسى الغرام
يعني اللي كان ويّاك ده إيه
وهم وخيال أو كان بجد
لو كان غرام ضاع بسّ ليه
ولاّ العناد فاق كلّ حد
عملت إيه قوللي بقى
حتى الفراق طال والبعاد
هوّ الغرام غلب وشقا
ولا انت بس غاوي العناد
معرفش ليه أصبح غريب
أمرك معايا يا قمر
من بعد ما كنت الحبيب
وكنت أغلى م البصر
حبيت هواك وانت كمان
بادلتني نفس الشعور
راح فين بقى الحب والحنان
وليه ابتدا الصد والنفور
ساعات لوحدي يا جميل
بحتار وبتسائل كتير
إزاي وليه صار مستحيل
بينا الوصال فين الضمير
عد حبيبي
يا حبيبي آه لو تأتي إليّا
قبل أن تقضي الوشايات عليّا
يا أعزّ الناس في الدنيا لديّا
عد رجاءاً مثلما كنت نديّا
يا حبيبي بعد شوق ٍ دام عمري
ما الّذي تبغيه من صدي وهجري
هل من المعقول يا شمسي وبدري
أن تريد اليوم بعد الوصل هجري
يا حبيبي كنت أرجو أن تراعي
عهد حبي باندفاع ٍ واقتناع
ليس أن تسعى لما فيه ضياعي
دون عذرٍ يا حبيبي أو وداع
يا حبيبي إنظر الأيام تجري
في سكون ٍ دون أن أدري وتدري
هل من الإنصاف أن تجري بعمري
دون أن تدري بأحوالي وأمري
برضه عاشقك
مهما تزعل مهما تبعد
مهما تتقل مهما تعند
مهما تنسى ومهما تهجر
مهما تقسى ومهما تغدر
اللازمه
مش هلومك مش هعاتبك
ولاّ حتى في يوم هحاسبك
فيش بإيدي غير اسامحك
يا حبيب قلبي وصالحك
مهما توعد مهما تحلف
هتقابلني ثمّ تخلف
مهما أسمع من وشايه
عن برود قلبك معايا
اللازمه
مهما أشكي من جنونك
ولاّ أبكي من ظنونك
مهما يخدعني كلامك
عن هيامك وغرامك
اللازمه
مش هتقدر
يا حبيبي مهما تزعل
مش هتقدر تنسى حبي
برضه قلبك مهما يتقل
مش هيقدر يسلى قلبي
كلّ شيء في الدنيا جاير
يتنسي من ذكرياتك
كلّ شيء لو كنت عايز
إلاّ حب سنين حياتك
ياما قبلك حدّ فكّر
ينسى حبه الأوّلاني
مهما فكّر مش هيقدر
غيرش بس يفتكره تاني
فكرك انت بالبساطه
تبتعد وتعيش بدوني
ولاّ يلزم لك وساطه
حتى تفرح بيك عيوني
يا حبيبي والله رايدك
حتى لو ضيّعت عمري
مش هعاندك ولا كايدك
للكريم فوضت أمري
يا دنيا
يا دنيا غنّي وزغرتي
من بعد غربه وشوق طويل
عشان حبيبي ومهجتي
قرّب معاد وصله الجميل
يا قلبي قوم واصحى بقى
وافتح عيونك ع الحياه
بالحب والشوق واللقا
هتعود لمجراها المياه
يا قلبي طير وانسى الجراح
وافرد جناحك من جديد
بكره الوصال ومن الصباح
حيخلّي يومك أحلى عيد
يا قلبي غنّي للقمر
واملا الوجود حب وحنان
بلاش نلوم تاني القدر
ولاّ البشر ولاّ الزمان
يا قلبي من دلوقتي عيش
وافرح ونول كل المرام
ده من النهارده لأ مفيش
غير بسّ أفراح الغرام
مش هقول لك
مش هقول لك يا حبيبي
إن قلبي بيك متيّم
مش هقول لك لو لهيبي
ع الخدود أثّر وعلّم
مش هقول لك يوم بحبك
ياحبيب قلبي وعيوني
حتى أسمع قبله قلبك
يعترف لي بحب جنوني
مش هقول لك إنت روحي
وانت قلبي وانت عمري
مهما طال سهدي ونوحي
ولاّ طال وجدي وصبري
مش هقول لك إنّك انت
نور حياة قلبي وعينيّه
حتى لو معرفش إمتى
راح تحن وتخاف عليّه
يا حبيبي كنت ناوي
من زمان احكي وقول لك
بسّ قلبك شفته غاوي
ذلّ قلبي سنين بتقلك
كلّك ذوق
كلّك ذوق يا حبيبي
كلّك رقّه وحنيّه
كلّك ذوق يا نصيبي
من زمان لسنين جايّه
كلّك ذوق والذوق زوّق
أيامي عمري بغرامك
كلّك ذوق والذوق حقق
أحلام قلبي بهيامك
كلكّ ذوق يا مسلّيني
يا اللي بحسنك ساحرني
كلّك ذوق يا مهنّيني
يا اللي بحبك آسرني
كلّك ذوق بكلامك
لمّا تجيني وتحكيلي
كلّك ذوق بملامك
حتى ان جيت تشكيلي
كلّك ذوق وانت قاعد
تسمعني وتلاغيني
كلّك ذوق وانت واعد
ترجع لي وتلاقيني
كلّك ذوق وانت غايب
وبتسأل تاني عليّه
كلّك ذوق وانت دايب
م الأشواق دايماً ليّه
مستني
قلبي الحزين يا حبيبي
مستني لحظة رجوعك
مستني م الشوق لهيبي
في الليل يقيد شموعك
مستني ترجع بقربك
أفراح غرامنا وهيامنا
مستني تمسح بحبك
أحزان فراقنا وخصامنا
يا نور عينيّه دخيلك
تعبت من طول بعادك
لو كان عليّه أجيلك
من بدري كرمال ودادك
بسّ انت يا خساره ناسي
أيام جميله وسعيده
هوّ انت بالطبع قاسي
ولاّ المكابره شديده
يا عمري إرجع وكفايه
ضيّعت قلبي وقلبك
ده لكلّ شيء حد ونهايه
حتى الملاوعه في حبك
نظرة ولمسه
نظرة عينيك البريئه
نسّتني ذلّي وهواني
ولمسة إيديك الجريئه
هزّت لي عمري وكياني
تقولش سحر في نظراتك
من غير إرادتي سباني
والله الهوى في لمساتك
من غير درايتي رماني
بنظرتك يا حبيبي
ريحتني من عذابي
وبلمستك يا نصيبي
رجعتني لشبابي
بنظرتك فتّح قلبي
من بعد غفوه تقيله
وبلمستك نوّر دربي
من بعد ظلمه طويله
بنظرتك شفت الدنيا
حلوه وجميله في عينيه
وبلمستك عشت في ثانيه
في دنيا تانيه غير ديّه
بنظرتك شفت الطرحه
قدام عينيه بتلالي
وبلمستك قلت الفرحه
والدنيا رجعت تحلالي
لو قلبي فكّر
لو قلبي فكّر وخبّى عنك
كان قلبي وفّر جراحه منك
إكمني عاشق تقلان عليّه
واكمني صادق بتشكّ فيّه
لأ يا حبيبي خلّيك في حالك
منتاش نصيبي لو مش ع بالك
معادش تنفع بينا المعادله
معادش تشفع إلاّ المقابله
معقوله أسهر عشان عيونك
وبات افكّر وعيش بدونك
إزاي هتنصف وازاي هترحم
من غير متعرف أو حتى تفهم
يا عمّ ياما قلبي شرح لك
في الحب كرامه مين كان سمح لك
تجرح شعوري من غير مناسبه
لو كان قصوري ملناش معاتبه
كان قلبي لك
كان قلبي لك وعقلي لك
وعمري كان بسنينه لك
كان عهدي لك ووعدي لك
وودي كان بصدقه لك
بسّ انت رحت من غير وداع
ونا اللي تهت في سنين ضياع
دلوقتي بس بعد السنين
للحيّ جاي مليان حنين
طب كنت فين أيام زمان
لمّا اشتكيت مرّ الهوان
وكنت فين لمّا الدموع
ع الخد سالت كالشموع
فكرك أنا هشتاق إليك
بعد الوداد مهان عليك
فكرك بنظره من عينيك
هرجع وهركع بين إيديك
لأ يا حبيبي فوق بقى
عهد الركوع راح والشقا
معرفش إيه خلاك تعود
غدر الزمان ولاّ الوجود
معرفش ليه حتى أنا
بعدت أصلا ً كام سنه
مهما العذر كان والسبب
ملّيت هواك إيه العجب
قبل المكابره
قبل المكابره والغرور
والهجر ليّّه والنفور
قبل الملاوعه والعناد
والغدر بيّه والبعاد
كنت الحبيب رمز الوفا
رمز المحبه والصفا
كنت النصيب لحن الغزل
لحن الموده والأمل
قبل الخصام قبل النوى
عشنا الغرام عشنا الهوى
بسّ العذول الله يجازيه
صعب عليه اللي احنا فيه
كان يجرى إيه لو ملت لي
ورجعت ليّه وقلت لي
مين غيري كان يسأل عليك
مين غيري كان يشتاق إليك
ظلمت روحك ليه كده
هوّ الغرام بالشكل ده
سمعت ليه بس للعذول
ونسيت غرامي والأصول
عدّيت عليه
عدّيت عليّه يا جميل
من بعد غربه وليل طويل
عدّيت عليّه من سكات
كأنّي لسّه في الشتات
لا رجعت ليك مليان حنين
ولا حلمت بيك طول سنين
رجعت ليه يعني أنا
إن كنت هتسيبني هنا
سنين ونا بشقى عشان
نقدر نعيش سوى بأمان
بسّ انت يا خساره نسيت
إني عشان خاطرك شقيت
غدرت بيّه وخنتني
وبعت حبي وبعتني
مكانش أولى تنتظر
لحدّ مرجع مقتدر
فضلت مال عني ودهب
لو بالحرام كان مكتسب
الله يسامحك ده الغريب
كان والله أرحم م الحبيب
معجزه
يا عمري حبك معجزه
في الوقت جاتني منقذه
من بعد ما قلبي كفر
بالحبّ والشوق والبشر
خليك معايا يا قمر
مهما الزمن طال والسفر
معادش فيّه اعشق وميل
من بعد حبك يا جميل
وهبت قلبي للغرام
والحب والشوق والهيام
حبيت كتير وشقيت كتير
لحدّ ما رضيت في الأخير
ياما انظلم قلبي وتاه
في البحث عن حبه وهواه
حتى النصيب ولاّ القدر
بعث لي حبي المنتظر
حبك يا عمري كان منى
قلبي وروحي كام سنه
يا ريت يا أجمل حب كان
قابلت حبك من زمان
كلّ ما اشكيلك
كلّ ما اشكيلك شجوني
يا حبيب قلبي وعيوني
تقسى وتغيب عنّي أكتر
حتى يصبح شوقي أكبر
لأ مفيش يا عمري حاجه
للغياب أو أيّ حاجه
ده الحنين والشوق في قلبي
حتى لو فضلت جمبي
يا حبيبي مهما تتقل
ولاّ تهجر ولا تزعل
مش بإيدي يا حياتي
أنسى حبك وانت ذاتي
مش بإيدي حتى احاسبك
ولا الومك ولاّ اعاتبك
حبي لك هيعيش معايا
رغم ظلمك يا منايا
قسّي قلبك يا حبيبي
مش راح ازعل من نصيبي
بسّ عايزك تفتكرني
وانت قاعد تنتظرني
فين زمانك
كلّ يوم يا نور عيوني
من بعيد بلمح عيونك
كلّ يوم وبشوق جنوني
بستعيد أيام وصالك
يا حبيبي من حنيني
واشتياقي عايز اجيلك
بسّ بين شكّي ويقيني
تاه سبيلي عن سبيلك
فين زمانك يا حبيبي
فين حنانك وحلاوتك
ليه كده خليت نصيبي
نار بعادك وقساوتك
يا حبيبي جمب منك
عشت أجمل وقت ليه
بسّ وجدي وبعدي عنك
طيّر النوم من عينيّه
لو بإيدي كنت هنساك
زيّ ما انت نسيت هوايا
إنّما الروح لسّه فاكراك
رغم وجدي وطول شقايا
يا حبيبي ازاي ضميرك
قسّى قلبك يوم عليّه
ده انت قبله كان مصيرك
مرتبط بيّه وفيّه
ضحكت الدنيا
ضحكت الدنيا حبيبي
وابتسم ليّه زماني
لمّا صار حبك نصيبي
والجمال خدني وسباني
ضحكت الدنيا لقلبي
يا حبيب قلبي وعيوني
والأمل نوّر ع دربي
بعد ما انزاحت ظنوني
ياما قلبي بات ليالي
يشتكي من نار غرامه
وانت خالي وغير مبالي
بانشغاله أو هيامه
بسّ لمّا اشتأقت ليّه
والغرام داعب خيالك
من عبير الودّ فيّه
ألف مرسال مني جالك
يا حبيبي عيش معايا
للأبد واسعد بحبي
ده انت عشقي وهوايا
والحياه طول ما انت جمبي
بلاش تقول
بلاش تقوللي بموت فيك
لمّا تلاغيني ولاغيك
يا ريت تقوللي بعيش بيك
لمّا تناجيني وناجيك
يا نور عيوني حنانك
حطّ الوجود سرّه فيه
والحبّ لو راح زمانك
لسّه الحياه ماشيه بيه
ياما الزمان فات وعدّى
وانت وغرامك ع بالي
ياما الفؤاد بالموده
عاش وانتصر ع الليالي
يا نور عيوني غرامنا
قصه وحكايه جميله
هتعيش بشوقنا وهيامنا
مدى الليالي الطويله
متخافش يا نور عيوني
ده الغرام لسّه في بدايه
متخافش ده الشوق جنوني والحنين ملوش نهايه
No comments:
Post a Comment